Кремлде Орусиянын президенти Владимир Путин АКШ лидеринин атайын чабарманы Стив Уиткофф менен жолугушту. Жолугушуу эки жарым сааттан ашып, президент Дональд Трамптын Москвага койгон ультиматуму талкууланганы тууралуу маалым болду.
Трамп Орусияга 8-августка чейин Украина менен элдешүүгө мөөнөт белгилеген. Кремлдеги жолугушуунун алдында Financial Times гезити өз булагына таянып, эгер Уиткоффтун бул сапарынан эч кандай майнап чыкпаса Кошмо Штаттардын лидери "ачууланарын" айтканын жазды.
Москвада жарым жыл ичинде Путин Уиткофф менен бешинчи ирет жолукту. "Агенство" басылмасы бул жолу эң кыска жолугушуу болгонун эсептеген.
Жолугушуунун жыйынтыгы тууралуу эки тарап азырынча маалымат тарата элек.
Уиткоффту Москванын Внуково аэропортунда тосуп алган Путиндин чет өлкөлөр менен инвестиция-экономикалык кызматташтык боюнча атайын өкүлү Кирилл Дмитриев жолугушуудан кийин "диалог [өлкөлөр ортосундагы] жеңет" деп Х соцтармагына жазды.
Путиндин жардамчысы Юрий Ушаков "Звезда" телеканалынын эфиринде сүйлөшүүнү "абдан пайдалуу жана конструктивдүү" деп баалады. Анын айтканына караганда Кремлде "украин кризиси" талкууланып, "АКШ менен Орусиянын ортосундагы стратегиялык кызматташтыкты өнүктүрүүнүн келечектеги мүмкүнчүлүктөрү" тууралуу сөз болду.
АКШнын атайын чабарманы Стив Уиткофф 6-августта Москвага барды. Аны Кремлде орус президенти Владимир Путин кабыл алып, азыр тараптардын сүйлөшүүсү уланып жатат.
Европа Биримдиги Кытайга каршы санкция салууга даярданып жатканын Politico басылмасы кабарлады. Басылманын Брюсселдеги дипломатиялык булагына таянуу менен жазганына караганда, буга Бээжиндин Орусиянын Украинага каршы согушун колдогону себеп болууда.
Reuters агенттиги июль айында учкучсуз учактар үчүн жасалган кытай кыймылдаткычтары санкцияны буйтап өтүү үчүн “өндүрүштүк муздаткыч орнотмолор” сыпатында Орусияга жашыруун жеткирилип келгенин жазган.
Politico басылмасынын булагы Reuters агенттигинин маалыматын “так жана Кытай өз көзөмөлүн күчөтүп жатканын көрсөтүп жатат” деп атаган. “Кытайдын көмөгүсүз согуш азыр такыр башкача болмоктугун чечкиндүү айта алам”, - деген басылманын анонимдүү булагы.
Евробиримдиктин он беш өлкөсү Бээжинге аталган жеткирүүлөр боюнча суроо менен кайрылышкан. Кытай буга өзүнүн катышын четке каккан, же комментарийден баш тарткан.
Санкцияны киргизүү августтан кийинкиге мерчемделүүдө. Ошол эле маалда, Евробиримдик Бээжин менен андан аркы сүйлөшүүлөрдөн баш тартуу ниети жок экени белгиленүүдө.
"КоммерсантЪ" жазгандай, Евробиримдиктин Орусияга каршы июлдагы 18-санкциясына Орусия менен соода кылган Кытайдын жети компаниясы менен Suifenhe Rural Commercial Bank жана Heihe Rural Commercial Bank банктары киргизилген. Кытай бийлиги мындай чектөөлөрдү негизсиз деп атап, өз компанияларынын укуктары менен кызыкчылыктарын коргоо үчүн жооп-чара көрүүнү убадалаган.
5-августта Украинанын президенти Владимир Зеленский АКШнын лидери Дональд Трамп менен телефондон сүйлөштү. Эки лидер АКШнын атайын чабарманы Стив Уиткоффтун Москвага сапарын утурлай сүйлөшкөнү маалым болду.
"Бүгүн Украина жана Кошмо Штаттар өз позицияларын координациялады, - деп Зеленский социалдык тармакка жазды. - Орусиялыктар катуу сокку ура баштаган кырдаалга ар кимибиз өз баабызды бердик. Президент Трамп Киевге жана башка шаарларга жасалган орустардын чабуулдары тууралуу толук маалымдар".
Украин лидери сүйлөшүү жемиштүү өткөнүн белгилеп, Трамптын "калыс жана туруктуу тынчтыкка жетүү үчүн жасаган бардык аракетине" ыраазычылык билдирди.
Апта башында Трамп анын жардамчысы Стив Уиткофф алтынчы же жетинчи августта Москвага барарын айткан. Вашингтондун өкүлү Орусиянын жетекчилиги менен жолугушмакчы. 8-августта Трамптын Москвага Украина менен тезинен тынчтыкка жетишүү үчүн койгон ультиматуму аяктайт.
АКШнын президенти эгер Москва тилге көнбөсө Кошмш Штаттар Орусияга, анын соода өнөктөштөрүнө тарифтерди көтөрүп жана "башка чараларды" колдонорун билдирген. Кремл Вашингтондун "маалыматына көңүл бурганын" билдирген. 5-августта Reuters Путин согушту токтотпой турганын жазды.